North Eastern Regional Power Committee Meeting-ah P&E Minister Pu F. Rodingliana tel

#ZONEWS July 18, 2025: Vawiin khan Mayfair Hotel, Guwahati-ah North Eastern Regional Power Committee (NERPC) meeting vawi 29-na neih niin, he hunah hian Mizoram Power & Electricity Minister Pu F. Rodingliana chu telin thu a sawi a ni.

Power Minister Pu F. Rodingliana chuan India hmarchhak State te’n NERPC kaltlanga power sector hnuaia hmasawnna tur sawrkar laipuia an thlente nasa zawka nawr a tul thu a sawi a. Nikuma NERPC meeting vawi 26-na neih thurel, Small Hydro Incentive Scheme for North East-Ministry of New & Renewable Energy (MNRE) hnuaia Hydel Project Megawatt 24 chin siamna tur tanpuina pek thin tihtawp tak chhunzawm tura Sawrkar laipuia thlen tawh, a hlawhtlinna tun thlenga hmuh la ni lo chu nasa zawka nawr leh a tul tih a sawi a. Tun tum meeting-in a rel Net Present Value (NPV) chungchanga central-a thlen turte pawh nasa taka bawhzui tlang turin NERPC member-te a sawm a. Pu F. Rodingliana chuan member-te chu kumin December thlaa Mizoramin NERPC Meeting a thlen huna tel theuh tur leh hunpui Krismas vuakvet boruakte chhim turin a sawm nghal bawk.

NERPC Meeting kentel Technical Core Committee meeting chu July ni 17, 2025 khan neih niin, an thurel tam tak zingah Forest Conservation Act, 1980 hnuaia forest ram tihchhiat avanga sum tam tak chawi ngai thin, Net Present Value (NPV) chu a bikin hmarchhak State-te hmasawnna ruhrel siamna kawnga harsatna thlentu anih avangin he harsatna hi Sawrkar laipuia thlen ni se tih a ni.

NERPC hi India hmarchhak State 7 te’n power supply hnianghnar leh rintlak an neih theih nan Electricity Act, 2003 hnuaia din a ni.

Vawiin NERPC Meeting-ah hian Power & Electricity Department atangin Secretary Pi K. Lalrinzuali bakah Er. H Lalruatkima, SE; Er. C Lalsawmliana, SE; Er. Lalrinmawia, SE leh Pu Joseph Lalzuitluanga, FAO te an tel a ni.