SIAHAAH WORLD AIDS DAY 2025 HMAN A NI

#ZONEWS Siaha December 1, 2025: Vawiin chawhma dar 11:00 AM khan ‘District AIDS Prevention and Control Committee ‘ Siaha buatsaihin MADC Golden Jubilee Hall, Siahaah ‘World AIDS day 2025’ hman a ni a, Pu M. Misael, Project Director (PD) DRDO chuan khuallian niin a hmanpui.

Pu M. Misael chuan natna hlauhawm tak tak a hluar zel a, Mizoramin India rama pakhatna dinhmun a hauhna ho pawh hi thil duhawm lo tak tak a ni, a ti. A bik takin HIV/AIDS leh Cancer – ah Mizoram dinhmun a hriat theih a, a zahthlak zawnga ngaihtuah phei chuan zahthlak tak a ni tiin, theihtawp chhuah a tul tawh tak zet a ti. Chhungkaw pawimawhzia sawiin eng dinhmunah pawh dingin, eng kawngah pawh harsatna tawk ila a damna dawi awmna hnai ber chu mahni inchhungkhur theuh a ni, a ti. Kohhrang, khawtlang leh sawrkar angin hma la thin mah ila, inchhungkhurah hmalakna a awm si loh chuan a hlawhtling thei thin lo; chuvangin mahni inchhungkhuarah theuh bul tan a, kan tu leh fate enkawl leh kilkawi kawngah tun aia uluk zawka tan lak a tul tiin, nu leh pate theihtawp chhuah turin a sawm a ni.

Khuallian chuan ram leh hnamin harsatna a tawh mek hi Health Department mal ringawt tan chuan do hneh chi a nih loh thu sawiin, Kohhran, khawtlang leh tlawmngai pawl hrang hrang bakah sawrkar department dangte nen pawh lungrual taka thawhho thiam a pawimawh hle a ti. A thlawna damdawi sem tam tak hi man to tak tak a ni a; hetiang zela kan kal chuan nakinah chuan a thlawna sem tur awm loh hunte a la awm thei a, chutih hunah chuan ram mipuite kan tanrual a ngai lehzual dawn a, inbuatsaihna tha tak neih a ngai a ni, a ti. Health Minister hmalakna zar a Mizoram MLA rualte’n an LADS fund atanga HIV/AIDS dona tura sing nga theuh an thawh chu lawmawm a tih thu tarlangin, Siaha district-a MLA pahnih te pawhin CMO-ah pawisa an chhunluh tawh a, a ropui hle a ni, a ti.

Dr. Lalrengpuii, Chief Medical Officer, chuan kum dangah chuan zirlai naupang, Tlawmngai Pawl leh Kohhran hruaitute nen hun hman thin a ni a, kuminah erawh chuan damlo enkawl mekte nen hmanho a ni thei chu a lawmawm a tih thu sawiin, hlawkna thar an hmuh ngei a beisei thu a tarlang a. Kumin ‘ World AIDS Day’ thupui atan ‘Harsatna kara HIV/AIDS hmachhawn dan thar’ tih a nih angin, hun harsa takah karah pawh tha thar, thil thar nen he natna hi hmachhawn a, hnehtu ni ngei turin kalkhawmte a sawm nghal bawk.

Vawiin ‘ World AIDS Day’ hmannaah hian Opiod Substitution Therapy Centre leh WADA-a damlo enkawl mekte bakah Health Department-a thawktute leh Official- te an tel thei a. Pi Zingia Hlychho, Counsellor, ICTC Siaha District – chuan HIV/AIDS kai theihna leh kai theih lohna hrang hrangah zirtirna a pe a ni.

Pu K. Beingiachhie, Sr. Education Officer, MADC, Pi P. Chaki, President, MCHP General Headquarters, Joint Village Council Association Chairman Pu NT. Sanga, Pu Elson Notlia, President, MSO General Headquarters te’n thu an sawi bawk a, Pi . H. Lalhlunsangi, chuan  lawmthu sawina neiin  hun a khar  a ni.