Zofate tan Nitin thuthar rintlak
India ram chhung thil thleng dahna
#ZONEWS July 20, 2025: Parliament Monsoon Session 2025 inbuatsaihna atan vawiin Sunday chhun dar 11.00 hian All Parliamentary Floor Leaders Meeting kan nei a.Thusawina hun pek ka nih angin Mizoramin airport kan neih chhun Lengpui Airport leh Delhi inkar thlawhtheihna chuan man to lutuk chungchang ka sawi chhuak a ni. July ni 9,2025(tun thla) khan…
I-League 2024-2025 khelh zawh atanga thla thum hnuah Inter Kashi chu Champion-ah puan a ni.
#ZONEWS July 18, 2025: April 6, 2025-ah I-League 2024-2025 khelh zawh a ni a, Inter Kashi leh Churchill Brothers te champion-ah an in ngai ve ve a. Buai a in tan chho chu a ni deuh ber mai. In khing an awm reng a. AIFF ten champion-a an puan avangin,Churchill Brothers ten champion an lo lawm fel dim diam tawh.
Hun a kal zel a, court of Arbitration for Sports (CAS) lama inkhinna pawh a kal zel.
Vawiin July 18, 2025 Zirtawpni hian Court of Arbitration for Sports (CAS) chuan thutlukna a siam fel ta a. AIFF buatsaih I-League 2024-25-ah champion chu Inter Kashi FC an ni ta. AIFF lam pawhin Inter Kashi an lawmpuina leh CAS thutlukna hi I-League.org lamah leh social media hrang hrangah an chhuah darh nghal a ni.
#ZONEWS July 18, 2025: Union Minister Sarbananda Sonowal chuan India leh Myanmar inkalpawhna tur Kaladan Multi-Modal Transit Transport Project (KMMTTP) chu kum 2027 atangin hman tan a ni dawn tih a sawi.
#ZONEWS July 18, 2025: Vawiin khan Mayfair Hotel, Guwahati-ah North Eastern Regional Power Committee (NERPC) meeting vawi 29-na neih niin, he hunah hian Mizoram Power & Electricity Minister Pu F. Rodingliana chu telin thu a sawi a ni.
Power Minister Pu F. Rodingliana chuan India hmarchhak State te’n NERPC kaltlanga power sector hnuaia hmasawnna tur sawrkar laipuia an thlente nasa zawka nawr a tul thu a sawi a. Nikuma NERPC meeting vawi 26-na neih thurel, Small Hydro Incentive Scheme for North East-Ministry of New & Renewable Energy (MNRE) hnuaia Hydel Project Megawatt 24 chin siamna tur tanpuina pek thin tihtawp tak chhunzawm tura Sawrkar laipuia thlen tawh, a hlawhtlinna tun thlenga hmuh la ni lo chu nasa zawka nawr leh a tul tih a sawi a. Tun tum meeting-in a rel Net Present Value (NPV) chungchanga central-a thlen turte pawh nasa taka bawhzui tlang turin NERPC member-te a sawm a. Pu F. Rodingliana chuan member-te chu kumin December thlaa Mizoramin NERPC Meeting a thlen huna tel theuh tur leh hunpui Krismas vuakvet boruakte chhim turin a sawm nghal bawk.
Lungleiin ram pum huap khawpui fai lawmman, Swachh Survekshan State Award a dawng
#ZONEWS July 17, 2025: Ministry of Housing and Urban Affairs (MoHUA) buatsaih India ram puma khawpui fai inelna, Swachh Survekshan Award 2024-2025 chu vawiin khan New Delhi-a Vigyan Bhawan-ah sem niin, Lunglei chuan State Award pakhat, Mizoram khawpuite zinga faina kawnga hma hun eng ber lawmman, ‘Promising Swachh Shehar Award’ a dawng a. Lawmman hi Mizoram sawrkara Urban Development & Poverty Alleviation (UD&PA) Minister Pu K. Sapdanga hovin, Lunglei Municipal Council (LMC)-a Vice Chairman Pu K. Lalrinawma leh Executive Councillor Pi Lalhruaitluangi Sailo te, UD&PA Secretary Pu Lalmalsawma Pachuau leh Director Pu Jacob Lalawmpuia te’n Union Minister of Housing & Urban Affairs Pu Manohar Lal kut aṭangin an dawng.
#ZONEWS July 15, 2025: Miss Grand India 2025 thlanna Star Entertainment buatsaihah Mizoram aiawha tel Vanlalnuntluangi, Ṭhuampui Veng Aizawl chu pahnihna atan thlan a ni. Miss Grand India 2025 thlanna hi July ni 4 aṭang khan Jaipur-ah ṭan a ni a, inelna hrang hrang neih a nih hnuah July ni 13 khan a hmawr bawk fel a ni ta. Vanlalnuntluangi hian 1st Runner up crown mai bakah sub-title pawimawh tak pahnih ‘Best in Swimsuit’ leh ‘Miss Social Media Queen’ title a dawng tel bawk.
#ZONEWS July 14, 2025: SDG NER District Index 2023–24 in a tarlan danin Mizoram chu Northeast State zawng zawng zingah Hmeichhia leh Mipa intluktlanna kawnga hmahruaitu, pakhatna a nih thu a sawi a. Hei hian kawng hrang hranga hmasawnna kawngah a tha zawngin state tan nghawng a nei ngei ang tiin DoNER India chuan an instagram page lamah an tarlang nghe nghe a ni.
Central chuan State-te chu Lei tihthatna (Fertilizer) lem leh tha lo lakah khauh taka hma la turin a hriattir.
#ZONEWS July 14, 2025: Central chuan State-te leh UT-te chu Fertilizer lem leh tha lo lakah khauh taka hma la nghal turin a hriat a. Union Agriculture and Farmer’s Welfare Minister Pu Shivraj Singh Chouhan chuan State leh UT zawng zawng Chief Minister-te hnenah hemi chungchang hi lehkha a thawn a ni. He lehkhathawnah hian Fertilizer lem hralh chhuah man vek turte, Sawrkarin a man hniam zawka Fertilizer a pek chhuah thin, phalna lova lo hralh thin man turte leh, Ram chhung hmun hrang hranga phalna lova Fertilizer lo siam leh hralhte chu man chhuak vek turin a hrilh a ni. Pu Chouhan chuan, “Agriculture hi India economy ruhrel siamtu a ni a, Loneitute sum hailuhna mumal leh nghet tak siamsak hi kan tihtur a ni bawk a, chuvangin Fertilizer tha a hun taka a man pawh an lei theihna tawk tura pek chhuah hi kan tih ngei ngei tur a ni,” tiin a sawi a ni.
#ZONEWS July 14, 2025: Vawiin khan Chief Minister Pu Lalduhoma chuan Prime Minister Pu Narendra Modi chu a chenna in, Delhi ah a hmu a, inkawmna hun tha tak an nei.
An thil sawidun zingah Thenzawl Peace City Project chungchang te , Aizawl to Thenzawl kawngpui National Highway a siam chungchang te, Handholding Policy hmalakna chungchang te a tel a. Tunhnaia Chin Hills, Myanmar-a buaina in Mizoram a nghawng dan chungchangte pawh an sawi bawk.
#ZONEWS July 14, 2025: Science and Technology Minister Dr. Jitendra Singh chuan a Social Media post-ah, Vawiin dar 4:30 PM hian Axiom-4 Mission-a feh chhuakte chuan an hmun an rawn chhuahsan ṭan dawn thu a sawi a. A sawi zel danin, Captain Shubhanshu Shukla leh a hote pathumte hian naktuk July 15, 2025 chawhnu dar 3 hian lei an rawn thleng dawn a ni. Leia an rawn tum hnuah, Captain Shukla leh midang pathumte hian ni sarih chhung lei hipna (gravity) a inseam rem turin, Flight Surgeon enkawlna hnuaia hun an hmang leh phawt dawn a ni.
