Zofate tan Nitin thuthar rintlak
#ZONEWS July 18, 2025: Vawiin khan DC Conference Hall, Keifangtlangah bank hrang hrang tana quarter tawp enletna District Consultative Committee, District Level Review Committee leh District Level Security Committee an thukhawm a, Champhai North bialtu MLA Er. H. Ginzalala’n khuallian niin a hmanpui a, Bawrhsap Pu Mohammad Aaquib chairman niin hun a kaihruai.
#ZONEWS July 18, 2025: Vawiin khan Mizoram Education Reforms Committee buatsaihin The Mizoram Education (Transfer & Posting of School Teachers) Rules 2025 chungchangah School Education Directorate Conference Hall-ah inrawn khawmna neih a ni a, School Education Minister Dr Vanlalthlana’n hun a hmanpui.
School Education Minister Dr Vanlalthlana chuan he hunah hian thusawiin zirtirtu transfer hi a hautak a, dilna thahnem tak a lut reng a, teacher ten harsatna chi hrang hrang an nei a, nu leh pa enkawltu an nih avanga transfer dil te, politics thila transfer nawrna te, chhungte dam lohna avanga dilte leh chhan tha tak tak neite an ni a, dilna chinfel hi hna hautak a nih thu a sawi. Minister chuan zirtirtu tam tak mahni post-ah an awm lova, Primary School ah te hian zaa 45 hi mahni post a awm lo an ni a ti.
#ZONEWS July 18, 2025: Vawiin khan Mizo Language Development Board Governing Body thutkhawm vawi 4-na chu Directorate, School Education Department Committee Room ah neih a ni.
MLDB Governing Body meeting hi Chairman Pu R.Lallianzuala’n a kaihruai a, Board Secretary Pu Lalsangpuia’n Report a pe a, meeting ah hian thu pawimawh tak tak sawiho a ni.
#ZONEWS July 18, 2025: Vawiin khan Serchhip SP Chamber ah Serchhip SP Pu Gavit Gogna hovin, Serchhip District a Police Station hrang hranga thubuai awm mek leh an dinhmun tlangpui thlirletna hun ‘Crime Review Meeting’ neih a ni a. Kum 2024 kum chanve (Jan-July) aiin kumin kum chanve chhung hian Serchhip District-ah Case 29-in a tlem zawk tih meeting-ah hian tarlan a ni.
#ZONEWS July 18, 2025: Vawiin chawhma khan Mission Organic Value Chain Development For North East Region (MOVCD – NER) Phase IV hnuaia Clover Organic bultuma ni 2 awh, ‘Value Addition & Food Processing Training’ kharna hun chu, Clover Organic Pvt. Ltd. Office, Chanmari, Ramhlun road-ah Agriculture & Farmers Welfare Minister Pu PC Vanlalruata hovin hman a ni a. Pi PC Lalngaihsaki, Asst. Project Officer, Clover Organic Pvt. Ltd. chuan hun kaihruaiin Pi H.Zodinpuii, State Coordinator, Mission Organic Mizoram chuan a telpui a ni.
#ZONEWS July 18, 2025: Vawiin khan Pu K. Sapdanga, Minister, UD&PA Department chuan Pu Manohar Lal, Cabinet Minister, Ministry of Housing and Urban Affairs chu Delhi-a ama chenna inah a kawm a, Mizoram khawpuite tih hmasawnna tur hrang hrang a sawipui.
UD&PA Minister hian Mizoram khawpui ten hma an sawn theih dan tur hrang hrang Union Minster hi a sawipui a. Heng zingah hian khawpui chhungah khuarel chhiatna laka invenna tur tui luankawr tha tak neih a tul dan te, bawlhhlawh sawngbawl dan kawnga Mizoram hmasawn theih dan tur te leh hemi kawnga central sawrkar puihna Mizoramin a mamawh dan chu ngaihpawimawh zual a ni.
#ZONEWS July 18, 2025: Vawiin khan Tourism Department hnuaia Thawnthu insawisiak ( Story Telling Competition) chu DC Office Lawngtlai buatsaihin Government Lawngtlai College Hall- ah neih a ni.
Thawnthu insawisiakah hian Lawngtlai District – in Zin mite ( Tourist) tana hmun nuam leh mawi tlawh tur a neih hrang hrangte chungchang sawi a ni a. He Thawnthu insawisiakin a tum ber chu Lawngtlai District – a hmun tlawh châkawm tak takte chu a zau thei ang bera phochhuah leh Lawngtlaiin Tourism lama hmasawnna a neihna tura hmalak a ni.
#ZONEWS July 18, 2025: Vawiin chawhma dar 11 khan UD&PA bultumin DAY-NULM “City Level Executive Committee” Khawzawl Bawrhsap Pu K. Vanlalthiana hovin an thukhawm a, District Hospital-a “Patient Attendent Shelter” sak dan tur an sawiho.
#ZONEWS July 18, 2025: Vawiin khan Mayfair Hotel, Guwahati-ah North Eastern Regional Power Committee (NERPC) meeting vawi 29-na neih niin, he hunah hian Mizoram Power & Electricity Minister Pu F. Rodingliana chu telin thu a sawi a ni.
Power Minister Pu F. Rodingliana chuan India hmarchhak State te’n NERPC kaltlanga power sector hnuaia hmasawnna tur sawrkar laipuia an thlente nasa zawka nawr a tul thu a sawi a. Nikuma NERPC meeting vawi 26-na neih thurel, Small Hydro Incentive Scheme for North East-Ministry of New & Renewable Energy (MNRE) hnuaia Hydel Project Megawatt 24 chin siamna tur tanpuina pek thin tihtawp tak chhunzawm tura Sawrkar laipuia thlen tawh, a hlawhtlinna tun thlenga hmuh la ni lo chu nasa zawka nawr leh a tul tih a sawi a. Tun tum meeting-in a rel Net Present Value (NPV) chungchanga central-a thlen turte pawh nasa taka bawhzui tlang turin NERPC member-te a sawm a. Pu F. Rodingliana chuan member-te chu kumin December thlaa Mizoramin NERPC Meeting a thlen huna tel theuh tur leh hunpui Krismas vuakvet boruakte chhim turin a sawm nghal bawk.
#ZONEWS July 18, 2025: Vawiin khan DC Conference Hall, Saitualah District Bawrhsap Dr. Lalngura Tlau kaihhruainain kumin Independence Day 2025 lawm dan tur relin thutkhawmna neih a ni.
Vawiin thutkhawmah hian Independence Day 2025 hman dan tur te ngaihtuahho niin, hlawhtling leh tluang taka hman a nih theih nan Sawrkar department hrang hrang te chu chanvo pek nghal an ni.
Independence Day 2025 hi zing dar 10:00, August ni 15, 2025 hian Keifang Centenary Sports Complex-ah neih tura rel niin, khuallian atan Pu F. Rodingliana, Minister of State, Power & Electricity chu sawm tum a ni. Independence Day lawmna hun hman zawhah hian sawm bikte tan DC Bangla-ah “VIP at home” programme neih tura ruahhmanna siam a ni.
